Flokkur: Uppskriftir

Saltkjöt og baunir, túkall

Það er svo gaman að elda mikinn mat í rólegheitum. Nú er fastan að byrja á öskudaginn og bolludagur og sprengidagur á næsta leiti. Mig langar í saltkjöt og baunir. Hér í Noregi þar sem ég bý er auðvelt að komast yfir gott svínakjöt, bæði saltað og ósaltað. Ég fjárfesti í söltuðum svínabóg fyrir lítinn pening í súpuna. Og svo er eldað, hægt og rólega og hugsað, borðað, hitað upp og borðað meira. Þykkar, matarmiklar súpur verða bara betri þegar þær eru hitaðar upp í annað og þriðja sinn.

Hér er uppskriftin, ef uppskrift skyldi kalla, því að hún breytist eftir því sem til er í ísskápnum.

500 grömm þurrkaðar gular baunir
Mikið, mikið vatn, ca 4 lítrar eða svo
2 laukar
4 gulrætur
1 gulrófa
3 lárviðarlauf
dálítið sellerí og eða annað rótargrænmeti úr ísskápnum
timiankrydd og kannski rósmarín líka
Saltur svínabógur (eða salt lambakjöt og beikon með, eða ósaltur svínabógur og beikon, eða…(frjáls eyðufylling)

Baunirnar eru lagðar í bleyti yfir nótt og vatninu síðan hellt af. Þegar baunirnar eru lagðar í bleyti og vatninu hellt af, þá nær maður ýmum efnum úr baunum og minnkar hættuna á vindgangi, sem oft er fylgifiskur baunaáts. Þá þarf líka minna að veiða ofan af súpunni, þegar baunirnar sjóða. Baunirnar settar í ferskt vatn og suðan látin koma upp. Síðan er allt sett í pottinn, kjötið og grænmetið og látið malla á meðalhita, þar til baunirnar eru orðnar meyrar og helst maukaðar. Síðan er beinið af kjötinu veitt upp og lárviðarlaufin og súpan er tilbúin.

Saltkjöt og baunir

Hér er ég búin að setja allt í pottinn og svo má þetta malla lengi vel.

 

Bláberjaskúffukaka

Ég tíndi fullt af bláberjum í Efstadal í gær og var að vandræðast með hvað ég ætti að gera við alla þessa dýrð. Þá datt mér í hug að baka það sem Ameríkaninn kallar „crumb cake“. Crumb cake er tvískipt kaka úr venjulegu deigi með sykurmulningi ofan á. Ég fann uppskrift af bláberja-mulnings-köku í einhverjum uppskriftabanka á netinu sem ég finn ómögulega aftur. Ég er sem sagt ekki höfundurinn að þessari köku, en er búin að íslenska, stækka, breyta og aðlaga uppskriftina. Hún er dásamlega góð og gefur tækifæri á að nýta eitthvað af bláberjunum. Ég er líka viss um að hægt sé að baka þessa köku með öðrum ávöxtum, t.d. frosnum ávöxtum sem margir nota í morgunbúst.

Rúgbrauðsuppskrift Helgu Svönu

Ég er að baka seytt rúgbrauð eftir uppskrift tengdamömmu minnar, Helgu Svönu Ólafsdóttur. Ég get óhikað mælt með þessu brauði. Deigið er hrært í höndum eða í hrærivél. Rúgbrauðið baka ég í heilu lagi í steikarpottinum mínum, en það er líka hægt að nota mjólkurfernur eða bakstursform. Brauðið er bakað í fjóra tíma á þessum hita en síðan er hitinn lækkaður niður í 110 gráður og brauðið bakað í 4-5 tíma í viðbót. Ef þið eigið brauðvél er líka hægt að helminga uppskriftina, stilla á kerfi fyrir gróft brauð og skella bakstursforminu svo í heilu lagi í ofninn á 110 gráður í fjóra tíma eftir að brauðvélarbaksturinn er búinn til að seyða brauðið.